Дизимнен өтиў    Кириў
Сайтқа кириў


ӨТКЕН ЖЫЛҒА БИР НӘЗЕР…

Дүньядағы қайсы мәмлекетти, қайсы елди алып қарасақ та оныӊ раўажланыўы журналистикасыз болмайды. Сонлықтан да, журналистиканы «төртинши ҳәкимият» деп атайды.
Журналистика ҳәр бир дәўир ҳәм ҳәр бир заманда да халықтыӊ турмысын, жасаў шараятын сәўлелендириў менен бирге, олар ҳаққында толық мағлыўмат бериўши, керек болса оны көрсетип бериўши айна есапланады. Заман талабы, илимий-техникалық прогресс, жаӊа информациялық технологиялар жәмийетти жеделлик пенен өзгертип баратырған бир ўақытта, журналистлердиӊ ҳәм журналистиканыӊ алдына жаӊа талап ҳәм ўазыйпалар қойылмақта. Әсиресе, бүгинги глобалласыў процессинде информация барлық тараўларда 1-орынға көтерилмекте ҳәм оныӊ тийкарында журналистика турыпты.
«Ҳәзирги ўақытта журналистлердиӊ ўазыйпалары да, олардыӊ алдына қойылатуғын талап та көп. Бирақ еӊ әҳмийетлиси турмыс ҳақыйқатлығын сәўлелендириўден ибарат. Бул журналистиканыӊ өзгермейтуғын ҳәм турақлы шәрти болып келген ҳәм сондай болып қалыўы керек» - деп атап өткен еди елимиздиң биринши Президенти И.А.Каримов. Демек, бүгинги күни журналист кадрларды таярлаўға қаратылған ўазыйпаларға айрықша итибар ҳәм жуўапкершилик пенен қараў талап етиледи.
Бизиң Бердақ атындағы Қарақалпақ мәмлекетлик университетимиз Өзбекстандағы журналист кадрларды таярлайтуғын санаўлы жоқары оқыў орынларының бири саналады. Отыз жылдан асламырақ ўақыттан берли ҳәр жылы бул дәргайды жигирмадан зыят жаслар питкерип шығып, ғалаба хабар қуралларының түрли тараўларына жол алады. Бақлап қарасақ, олардың арасында Өзбекстанға ҳәм Қарақалпақстанға мийнети синген журналистлер, ҳәр қыйлы халық-аралық ҳәм республикалық таңлаўлардың жеңимпазлары, қулласы өз кәсибиниң нағыз маманы болған қәнигелер баршылық.
Бүгинги күнде де журналистика кафедрасында журналистика қәнигелиги бойынша билим алып атырған студентлердиң ылайықлы кадрлар болып жетилисиўи ушын бир қатар жумыслар алып барылмақта. Оларға тек теориялық билим берип қоймастан, таңлаған кәсибине қызығыўшылық, ықлас ҳәм ҳүрмет сезимлерин қәлиплестириўге қаратылған жумыслар әмелге асырылмақта. Усы мақсетти гөзлеген ҳалда оқыў жылы даўамында ҳәр қыйлы семинар-тренинглер, мастер-класслар, конференция ҳәм таңлаўлар шөлкемлестирилмекте. Атап айтатуғын болсақ, өткен 2015-жылдан баслап кафедрада «Жас журналист» таңлаўы шөлкемлестирилип, онда студентлердиң жыл даўамында ғалаба хабар қуралларында жәрияланған дөретпелери итибарға алынды. «Жас журналист- 2015» таңлаўының жуўмағында 13 студент жеңимпаз деп табылған болса, ең қуўанышлысы сол жеңимпазлар бүгин журналистика тараўында өзлериниң ылайықлы орнына ийе. Атап айтатуғын болсақ, Несийбели Мәмбетрзаева «Еркин Қарақалпақстан» газетасында, Темирбекова Жығагүл Қарақалпақстан радиосында, Өтениязова Гулзада «Нөкис пединституты» газетасында, Уразалиева Перизат «Кәсиплик билимлендириў» газетасында, Рўзимова Озада Елликқала районлық «Камолот» жаслар жәмийетлик шөлкеминде қәниге болып ислеп атырған болса, Гулжаҳан Сейтназарова менен Ислам Матеков университет магистратурасында оқыўларын даўам етпекте.
Жаңа жылымыздың басында турып, өткен жылға нәзер тасласақ студентлеримиздиң жетискенликлеринен кеўлимиз қуўанышқа ҳәм мақтанышқа толады. Журналистика қәнигелигиниң 2-курс магистанты Гулжәҳан Сейтназарова усы оқыў жылында Президент стипенианты болыўға ерискен болса, 4-курс студенти Сарбиназ Турешова Бердақ стипендианты болды. 3-курс студенти Дилафруз Айтбаева Өзбекстан көлеминде өткерилген «Жылдың ең белсенди жас журналисти» таңлаўында «Интернет журналистикасы» номинациясы бойынша 3-орынды жеңип алды. Өзбекстан көлеминде өткерилген «Янги нигоҳ» видеороликлер таңлаўында 3-курс студенти Сарбиназ Худайбергенова «Миллий қәдириятлар ҳәм үрп-әдетлерди сәўлелендирген ең жақсы видеоролик» номинациясы бойынша, Сарбиназ Турешова «» номинациясы бойынша сыйлықлы орынларды ийеледи.
2016-жылдың ноябрь айында Ташкент қаласындағы «Дурмен» бағында Өзбекистан Жазыўшылар Аўқамы тәрепинен шөлкемлестирилген «Талантлылар мектеби» VIII республикалық семинарына студентлеримизден Д.Айтбаева, Т.Мухиятдинова ҳәм С.Турешовалар қатнасып, сертификат алып қайтты.
Дөретиўши студентлеримиздиң, атап айтқанда Т.Мухиятдинованың «», М.Мамбетниязованың «», ал илимий бағдарда С.Есемуратованың «Глобалласыў дәўиринде социаллық тармақлардың хызмети» атамасындағы китаплары баспадан шықты. Мине, бул көрсеткишлер факультетимиз ҳәм кафедрамыз оқытыўшыларының пидәкерлик мийнетлериниң нәтийжеси десек қәтелеспеймиз.
Әлбетте, ҳәрекет, ықлас, дөретиўшилик ҳәм мийнет тек ғана жеңимпаз болыў ушын орынланбайды. Бирақ, хошамет ҳәм алғыс жаңа дөретиўшиликке, жаңа идеяларға тийкар болыўы анық. Журналистика да дөретиўшилик кәсип болғанлықтан, биз студентлеримиздиң ҳәр бир дөретиўшилигине бийпарқ емеслигимизди, оларды бақлап, гүзетип баратуғынлығымызды, жақсы мақалалар жазса мақтаныш ететуғынлығымызды да билдирип өткимиз келеди. Дөретиўшилик – бул журналистлик кәсибиниң тийкары. Журналист қаншама көп ҳәм жақсы жазып, өз ўазыйпасын қаншелли жоқары дәрежеде орынласа, оныӊ мәмлекеттиң раўажланыўына қосқан үлеси соншелли дәрежеде жоқары болады. Сонлықтан да, дөретиўшилик дәрежеси жоқары кадрлар таярлаў мәселеси еӊ жуўапкерли ўазыйпалардыӊ қатарына киреди.

Оразымбетова Злиха
Журналистика кафедрасы баслығы
Комментария жазыў
Атыңыз:
E-Mail:
Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Вставка смайликов Вставка ссылкиВставка защищенной ссылки Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера
Код:
          Включите эту картинку для отображения кода безопасности
кодты жаңалаў

Кодты киритиң: