Дизимнен өтиў    Кириў
Сайтқа кириў


ЛЮДВИГ ВАН БЕТХОВЕН ҳаққындағы шынлық
Людвиг Ван Бетховен немис композиторы, пианинашы ҳәм дирижёр. Ол 1770-жылдың декабрь айында дүньяға келген. Оның анық туўылған ўақты ҳеш жерде көрсетилмеген. Тек шомылдырылған күни 17-декабрь екени белгилеп өтилген.
Людвиг Ван Бетховен дәслепки музыкалық билимин өз әкесинен алады. Атасы Луи Бетховен, әкеси Иоганн Бетховен де музыкант болған. Әкеси сарайда капелла, яғный хор менен музыкашылардың биргеликтеги коллективинде хызмет еткен. Ол бир жағынан қосықшы да болған, сондай-ақ, скрипка, клавесине саз әсбапларында жүдә жақсы намалар шерте алған. Людвиг ҳешкимге бойсынбаўы, шаққанлығы, бираз менменлиги, сондай-ақ, мийнетсүйгишлиги менен атасы Луи Бетховенге уқсайтуғын еди.
1780-жылдан баслап Бетховенге Нефе устазлық ете баслайды. 1782-жылы Бетховен 12 жасқа толғанда клавесине, скрипка, орган саз әсбапларын жүдә жақсы шерте алатуғын, ал нота дәптериндеги жазыўларды ҳеш қыйналмастан оқый алатуғын болған. 13 жасынан баслап сарайда капелла коллективинде ислей баслады. Ҳәр қандай қыйыншылықларға шыдаған Бетховен, 1787-жылы, яғный 17 жасында белгили Вена қаласына келеди. Бундағы оның мақсети Моцарт пенен ушырасыў болған. 1792-жылы болса, ол Венаға пүткиллей көшип келеди. Бетховенниң дәслепки устазы Йозеф Гайдн еди. Ол жас музыкант Бетховенниң талантын жақсы баҳалайды. Ол өз еске түсириўлериниң биринде: «Ҳәм билимли, ҳәм жетерли билимге ийе болмағанлар да Бетховенниң Европа композиторларының ең қәбилетлиси екенин билиўи керек, ал мен болсам оның устазы екенимнен қуўанышлыман» деп жазады.
Бетховен 1792-жылы 50ге шамалас музыка жаратыўға үлгереди. 1799-жылы ол еки шәкирти, яғный Тереза ҳәм Жозефине Брунсвиклерге сабақ бере баслайды. Солай етип, дүньяға белгили композитор Людвиг Ван Бетховен 1827-жылы дүньядан өтеди.
Еситиў қәбилети
Енди Людвиг Ван Бетховен ҳаққында айрым мағлыўматларды келтирип өтсек. Әлбетте, еситиў қәбилети музыкант ушын қаншелли дәрежеде әҳмийетли екенин билесиз. Людвигте еситиў қәбилетиниң төменлеўи биринши мәрте 26 жасында сезиле баслаған. Бул ҳаққында ол 1801-жылы достына жазған хатында айтып өтеди. Және буны адамларға билдириў оның ушын жүдә аўыр екенлигин, сол себепли еки жылдан берли жәмийеттен узағырақ жүриўге ҳәрекет етип атырғанлығын, егер басқа кәсип ийеси болғанында бул ҳәдийсени өзи ушын оншелли дәрежеде аянышлы қабыл етпейтуғынлығын, бирақ та музыкант ушын буның жүдә аянышлы жағдай екенлигин айтып өтеди.
Және бир қызықлы факт: Музыка әлеминиң патшасы Людвиг Ван Бетховен әдетте ҳәр күни музыка жаратыў ушын столға отырыўдан алдын, муз салынған суў ыдысқа басын салып отыратуғын болған. Бул Бетховен ушын әдетке айланып қалған болып, композитор бул әдеттен өмириниң ақырына шекем бас тартпаған.

З.Оразымбетова
Журналист
Комментария жазыў
Атыңыз:
E-Mail:
Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Вставка смайликов Вставка ссылкиВставка защищенной ссылки Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера
Код:
          Включите эту картинку для отображения кода безопасности
кодты жаңалаў

Кодты киритиң: