Дизимнен өтиў    Кириў
Сайтқа кириў


БӘРИ ЖАҚСЫ БОЛАДЫ!
Дәстүрхан жайылған. Еки дос әңгиме дүканын қурып отыр.
— Сен, Жығагүл, бәрқулла сулыў ҳәм хошкеўилли болып жүресең. Айтшы, буның сыры неде? — деп сорады Мәҳийда.
Жығагүл бираз ойланыңқырап қалды, соң жуўап бериўге киристи:
— Бизиң өмиримизде, Мәҳийда, жақсы ҳәм жаман ҳәдийселер болып турады.
Мениң де ҳәр күним тәшўишлерге тола. Жумыс ислеўим, шаңарағым ҳәм үйим менен айланысыўым, күйеўимди, балаларымды қуўантып турыўым керек. Булардың ҳәммеси де — мийнет. Әлбетте, аңсат емес. Бирақ, жақсы жери, маған усындай ўақытлары бир қупыям жәрдем берип турады.
Мәҳийданың қулағы «қупыя» деген сөзге елең ете қалды. Қатты қызықты:
— Маған сол қупыяңды айтшы, керегиме жаратайын. Мениң де өмиримде жумыслар көп. Балаларым менен машқулман. Шаңарағым жүдә үлкен, сонлықтан болса керек, өз қуўанышларыма ўақыт та қалмай атыр!
— Қупыям соннан ибарат, мен хәр күни миннетдаршылық билдириў ушын бирнеше минут ўақыт таба аламан.
— Миннетдаршылық? — деп исенбеслик пенен сорады Мәҳийда, — Сонда сен кимге миннетдаршылық билдиресең?
— Мен бул дүньяға ҳәр күни маған жаңадан-жаңа унамлы тәсиретлер инәм етип атырғаны ушын миннетдаршылық билдирип тураман, — деди Жығагүл жайыла күлимсиреп. — Күйеўиме миннетдарман, өйткени шаңарағымыз беккем ҳәм татыў. Балаларыма миннетдарман, себеби олардың арқасында ана болыў бахтына миясарман. Олардың жаўдыраған көзлерине қарайман ҳәм қуўанышлы күлкилерин ҳәр күни еситиў маған рәҳәт бағышлайды. Ҳәр биримиздиң басымызға гейде жаман күнлер туўып қалады, усындай ўақытлары мени досларым, ағайин-туўғанларым өз араларына алады. Оларға миннетдарлығым шексиз. Әжайып ҳәм сулыў жерде үйимиз жайласқаны ушын тәбиятқа миннетдарман. Билесең бе, қурдас, миннетдар болыў — бул, әжайып қәсийет.
— Миннетдар болыў... — Мәҳийда терең ойға шүмди. Оның жүзинен гәп маңызын аңлап киятырғанлық сезилди. — Миннетдар болыў, ырасында да, мени де сендей хошкеўилли ҳәм сулыў ете ме?
— Сулыўлықты алсақ, ол бет-жүзди әрестелеўши пардозлаўдан емес, ал инсанның ишки дүньясынан басланады. Өйткени, миннетдаршылық ишки сарайыңды жақтыландырады. Миннетдаршылық сени хәр бир күннен жақсылықты сезиўге үйретеди ҳәм ҳақыйқатында да бахытлы етеди — Жығагүл өзиниң қурдасын қушақлады ҳәм былай деди: — ал, бүгинги күнге келсек, миннетдаршылық ҳаққындағы билимимди бөлисиўге, ортақласыўға мүмкиншилик жаратқаны ушын оған миннетдарман.

Палбийби ӘМИРХАНОВА
"Саза" журналынан
Комментария жазыў
Атыңыз:
E-Mail:
Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Вставка смайликов Вставка ссылкиВставка защищенной ссылки Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера
Код:
          Включите эту картинку для отображения кода безопасности
кодты жаңалаў

Кодты киритиң: