Дизимнен өтиў    Кириў
Сайтқа кириў


АНАСЫ БАР АДАМЛАР ҲЕШҚАШАН ҚАРТАЙМАЙДЫ!
Перзент – ата-ана бахыты, қуўанышы, келешек даўамшысы. Турмыс қурған ҳәрбир жас өз перзентиниң дүньяға келиўин интизарлық пенен күтеди, оған жақсы нийетлер менен ат қояды, әлпешлеп тәрбиялайды, камалға келтиреди. Өзи ишпей ишкизип, жемей жегизип, қатарының алдында болыўын тилеп желип жортады.
Бала тәрбиясында атаның да, ананың да өз орны бар. Бирақ, соның ишинде түн уйқысын төрт бөлип, ай менен сырласқан ананың орны айырыша. Анажанларымыздың бундай хызметлерин о дунья, бу дунья қайтара алмаймыз. Ананың бир күнлик ақ сүтин өмир бойы пал татып жүргениңде де екеўин теңлестире алмайсаң. Сол ушын да «Ана сүти палдан да татлы» делинген.
Әй, инсан баласы! Перзентлик ўазыйпаңды ана қарызын қайтарыў менен тең көрме. Ол екеўи басқа-басқа нәрсе. Олар арасында аспан менен жер шелли парық бар. Перзентлик ўазыйпаңды сени дуньяға келтиргени ушын ал, ана қарызын аўзыңа палдан шийрин ақ сүтин тамызғаны ушын орынла!Өйткени,сениң бул дуньяға келип, усы дәрежеге ерисиўиңе, бахытлы күнлерге жетиўиңе себепши ата-анаң емеспе? Бүгинге шекем басып өткен соқпағыңа бир нәзер сал, артта қалған бул өмир соқпағы қаншама қыйсық, ойлы-бәлент, тикенли жоллар балса да жолынан адасып қалмасын деп туўры жол силтеген ким? Ата-анаң емеспе?!
Әй, перзент! Усыншама жақсылықларын көрип, олардың кеўлин қабартыўға қалай ҳүжданың барады? Өмирде ҳәр түрли инсан бар. Соның ушын да бес бармақ бирдей болып жаратылмаған.
Турмыста өз перзентиниң тәшўишинде күйип, өртенип, жанып жүргенлерди көп ушыратамыз. Ана қарызының не екенин түсинип жетпегенлер, ананың қәдирин билмейтуғынлар ғана ата-аналарының усындай аўыр күнлерге түсип қалыўына себепши болады. Неге, не ушын олардың усындай машақатлы, аўыр мийнетлерин көре-биле турып қапа қыламыз? Сонда неге, бизиң көзимиз соқырма, я қәлбимизге қулақ тўрип билмеймизбе? Яқ, бизиң қәлб көзимиз соқыр. Ата-ананың перзент тәшўишинен басқа да мың түрли машқаласы өзине жетеди. Неге енди биз биле тура мойнына уўайым қайғы сала беремиз? Машқалаңды өзиң шешетуғын ўақыт жетип келмедиме? Олар да қайғыны умытып, еркин қус сыяқлы ушқысы келетуғын шығар. Сен камалға келдиң, ержеттиң, енди олардың басына мүшкил салмай өз жүгиңди өзиң көтериўге ҳәрекет ет. Ата-анаңа сондай хызмет исле, көрип қуўаныштан көзи жайнасын, оларға өз мийнетиниң жемисин қөрсет. Буның бәри өз қолыңда тур.
Әзийзлер! Ата-анаңызға сондай хызмет етиң қалған өмиринде уўайым қайғы не екенин де билмей жасасын. Сениң менен пүткил әлемге мақтана алатуғындай ылайық перзент бол! Себеби, олар сениң ҳәр бир жақсы ҳарекетиңнен баладай кеўли толып тасады. Бизге әлем нурын саўға еткен әзийз ата-анамыз ушын жалынлап турған от ишине түсиўге таяр перзентлер болайық. Ата-анамыз алдымызда аман болсын! Илайым, бахтымызды көриў несип етсин.Анасы бар адамлар ҳешқашан қартаймайды деген сөзди умытпай өмир сүрейик!!! .



Нурмағамбет Жиенбаев
Бердақ атындағы Қарақалпақ мәмлекетлик университети журналистика тәлим бағдарыың 3-курс студенти
Комментария жазыў
Атыңыз:
E-Mail:
Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Вставка смайликов Вставка ссылкиВставка защищенной ссылки Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера
Код:
          Включите эту картинку для отображения кода безопасности
кодты жаңалаў

Кодты киритиң: