Дизимнен өтиў    Кириў
Сайтқа кириў


УНИВЕРСИТЕТ – АТЫҢ УЛЛЫ ДӘРГАЙСАҢ
Қарақалпақ мәмлекетлик университети. Республикамыздың тийкарғы таяныш жоқары оқыў орынларының бири. Бул орында елимиздиң ертеңги келешек ийелери-қәнигелер тәлим-тәрбия алмақта. Мәмлекетимизде бир қанша жоқары билимлендириў орынлары болса да, университетимиздиң, орны айрықша. Уллы сөз устасы Ибрайым атамыздың:
Сен муқаддес медресем баўырман,
Әрман гүли гүлшаныңнан таўылған,
Қақтың суўын аңсап келген кийиктей,
Биз келгенбиз билим излеп аўылдан, - деп жазғанындай республикамыздың түрли орынларынан билим аламан, илим ийелеймен деген мақсетти алға қойған жасларға университетимиздиң есиги ҳәмийше ашық. Олардан тек ғана бул муқаддес орынға кириў ушын билим талап етиледи.
Университет – жоқары билим дәргайы. Ҳәр жылы бул дәргайды қаншадан-қанша жас кадрлар питкерип шығып, турмыстың түрли тараўларында жемисли хызмет етип атыр. Олар университетте алған билимлерин өндиристе қолланып, мәмлекетимиздиң гүллеп-жаснаўына, раўажланыўына өз үлеслерин қосып атыр, әлбетте. Олардың көпшилиги мектеп ҳәм лицейлерде, кәсип-өнер колледжлеринде келешегимиз даўамшыларына билим берсе, айырымлары аўыл хожалығы тараўында, ден саўлықты сақлаў, ҳуқықты қорғаў уйымларында, мәденият ҳәм көркем-өнер, ғалаба хабар қуралларында, қулласы өмирдиң ҳәр қыйлы салаларында табыслы мийнет етпекте. Ал, базылары мәмлекетти басқарыў уйымларында ислеп атыр, ҳәттеги Олий Мажлис Нызамшылық палатасы депутатлары ҳәм Сенат ағзалары. Олардың бизиң университетимизде билим алғанлығын еситип, бойында қандай да бир мақтаныш сезимлери пайда болады.
Илимпазлар илим жүгин көтерген,
Талпынғанға билим жолын көрсеткен,
Устазларым тәлим берип үйреткен,
Университет атың уллы дәргайсаң.
Достымыздың бул қосық қатарларының үлкен мәниси бар. Университетимизде студентлердиң билим, илим сырларын терең ийелеўи ушын толық мүмкиншиликлер жаратылған. Кең көлемли китапханамыз халықаралық интернет тармағына жалғанып, бизлер оннан еркин пайдаланып атырмыз. Оқыў орнымыздың студент-жасларына бир неше академик, илим докторлары ҳәм басқа да профессор-оқытыўшылар тәлим-тәрбия берип келмекте. Устазларымыз илимге қызығыўшы жасларға өз билимлерин, көрсетпелерин бериўден ҳеш шаршамайды. Устазларының исенимин ақлап илимий-изленислер алып барып атырған досларымыз да көпшиликти қурайды. Олар бир қанша жетискенликлерге де ерисип келмекте. Буны биз мәмлекетлик стипендия ийелери мысалында көриўимизге болады.
Улыўма алғанда, университетимиз жәмәәти илим, билимлендириў, спорт, руўхый-ағартыўшылық бағдарында айрықша жетискенликлерге ерисип келмекте. Республика көлеминде ҳәм жоқары оқыў орынлары арасында өткерилип атырған таңлаў ҳәм жарысларда белсендилик пенен қатнасып атыр. Әлбетте, досларымыздың қолға киргизген табыслары буннан дерек береди.
Ҳәзирги ўақытта университете ири қурылыс ислери даўам етпекте. Енди Қарақалпақстан жаслары буннан да жақсы, заманагөй университетте билим алады. Тек ғана республикамыз жаслары емес, бәлким қоңсылас ўәлаят ҳәм республикалардан келген жасларға да оқыў орнымыздың есиги ашык. Себеби, университет – жаслардың дослық үйи.


Қурал Кеңесбаев
ҚМУ 3-журналистика
Комментария жазыў
Атыңыз:
E-Mail:
Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Вставка смайликов Вставка ссылкиВставка защищенной ссылки Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера
Код:
          Включите эту картинку для отображения кода безопасности
кодты жаңалаў

Кодты киритиң: