Дизимнен өтиў    Кириў
Сайтқа кириў


ЖАҢА ИМАРАТЛЫ ОҚЫЎ ДӘРГӘЙИМ!!!
Көгалай көк теңиз мисли, пүткил жер шары үстинде дастанып турған көк аспан, оның астында саӯлат төгип, даңғаралы Нөкис қаласының шырайына шырай қосып, көркине көрк бағышлап турған әзиз ҳәм муқәддес, Университетим. Сениң соншама, халқымызға кең түрде мийнети синген илим кандидатлары, профессорлар ҳәм басқа да илим ғайраткерлери жетилисип шыққан есигиңнен атлап өтип, баӯырыңда билим зиясынан қанығып илим үйрениӯди алдыларына мақсет еткен жаслар қаншама дейсең.
Өзим оқыӯға ҳүжжет тапсырыӯға келген ӯақтымда, Университет әтирапинда сеңдей соқлығысып, жүрегин қолына алып ҳалықлап жүрген жаслардың көплигинен бираз ҳаӯлыққанман, бир тәрепинен қуӯанғанман да. Өйткени, соншама жаслар арасынан бахыт атым алға шулғып кетип оқыӯға қабыллансам, жүзден жүйрик, мыңнан тулпар, миллионнан қаназатлығымды дәлиллегеним болады деп есаплар едим. Әлбетте, соның менен бирге несийбемниң де жүрисип кеткени болады. Ал, ойлаған нийетлерим әмелге асып, бүгинлигинде сүйлиндей сәрәнжамлықта сулыӯланып, саӯлаты сәрӯи талдай көринген пирли имәратта тәлим алып атырғанымнан қуӯанышлыман.
Тест сынақларынан өткенде, «Нәтийжеси қашан шығады, қандай болады, мени шексиз бахтқа бөлейме, яки керисинше болама екен»-деп жүрегим қынына сыймай, оқыӯ жөнинде пикир-ойларым мени шексиз туңғыйыққа батырып кеткендей болар еди. Мүмкин, буның бәри сабырсызлық ҳәм қорқыныш пенен күткенимнен болса керек.
Университетимизде быйылғы жылдың өзинде ири оңлаӯ жумыслары питкерилип, бизлер оның жарық ҳәм пайызлы, кең ҳәм көрикли бинәларының биринде тәлим алып атырмыз. Соның менен бирге, тәлим дәргәйимызға ҳәм халқымызға жүдә көп мийнети синген, Университетимиздиң көп жыллық басқарыӯшысы болған ҳүрметли профессор Ч.Әбдиров атына қойылған кең көшениң айрықша безеги, гүлтажы болып турған бас бинәмыз тәрийпин баянлаӯға сөз жетпес. Оқыӯ жылымыздың екинши бөлиминен баслап бирнеше топарлар биргеликте, бир бөлмениң ишинде тәлим алыӯ имканяты бар, жарық, кең оқыӯ ханалары болған паток заллар яғный, жүз, бир жүз жигирма, ҳәтте, оннан да көп орынлықларға ийе бөлмелер жаңаланып иске қосылды. Бул жерде жүдә жоқары билимге ийе устазларымыз аянбай жумыс ислеп, сабақ түсиндиреди. Ал, бизлер болсақ оларды жалықпай тыңлап, иләжи барынша көбирек билим үйрениӯге талпынамыз, лексияларын тыңлап барамыз. Аӯа да, себеби, бул күнлерге жеткенлер бар, жетпегенлер сан-санақсыз. Кими туйғындай туӯлап, кими қаршығадай қайымшыл болып, бүркиттей бийалайды тосық көрмейтуғын, излениӯшең, таалапшаң студентлер ғана бул кийели дәргәй дәрӯазасынан даӯрық салып, даңғара салтанат қурып өткен. Қәйткенде де, ең алғыр баз болып, пайтахтымыз көшелерине көрк қосып турған жаңа ҳәм сулыӯ имәратларда билим алып атырғанымыздан бахытлы ҳәм қуӯанышлымыз. Бундай оқыӯ имәратларда тәлим алыӯдың, ҳәттеки, дәрӯазасынан атлап өтиӯдиң өзи үлкен гәп.
Салтанатлы ҳәм шәӯкетли болған илим дәргәйимызға жаңаша шырайы ҳәм көрки қутлы болсын деп қаламыз.

Искендеров Жахангир, КМУ, 1-курс студенти
Комментария жазыў
Атыңыз:
E-Mail:
Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Вставка смайликов Вставка ссылкиВставка защищенной ссылки Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера
Код:
          Включите эту картинку для отображения кода безопасности
кодты жаңалаў

Кодты киритиң: