DataLife Engine > Jan'aliqlar > АШЫҚ АСПАН АСТЫНДАҒЫ МУЗЕЙ ҚАЛА – ХИЙЎАҒА САЯХАТ

АШЫҚ АСПАН АСТЫНДАҒЫ МУЗЕЙ ҚАЛА – ХИЙЎАҒА САЯХАТ


21-08-2017, 21:49. Разместил: zlixa

Заманагөй экономиканың жаңа ҳәм перспективалы буўыны туризм болып табылады. Соңғы ўақытлары елимизде туризмди раўажландырыў арқалы елимиз экономикасын жоқары басқышларға көтериў мәмлекетлик сиясат дәрежесине көтерилди. Әсиресе, уллы ҳәм мақтанышлы өтмишимиз, тарийхымызды көрсетип беретуғын ашық аспан астындағы музей қала деп аталған тарийхый қалаларға саяхатлар шөлкемлестириў ғалабалық ҳәрекетке айланбақта.

Усы жылдың 18-август күни Бердақ атындағы Қарақалпақ мәмлекетлик университети ректоры А.Реймовтың басламасы ҳәм университет Кәсиплик аўқамы және Жаслар аўқамы басланғыш шөлкеминиң қоллап-қуўатлаўы менен университетимиздиң нураный профессор-оқытыўшылары ҳәм студент-жасларының уллы өтмиштиң гүўасы, мақтанышымыз есапланған Хийўа қаласына саяхаты шөлкемлестирилди. Саяхатқа шыққан 52 оқытыўшы ҳәм студентлер Хийўа қаласының көрки ҳәм ажыралмас бөлеги есапланған Ичанқала архитектуралық комплексиндеги мешит-медреселер, хан сарайлары, минаралар, тарийхый турақ жайлар, олардың жаратылыў тарийхы, тарийхый әҳмийети ҳәм бүгинги күндеги жағдайы менен жақыннан танысты.

Қарақалпақ халқының классик шайыры Әжинияз Қосыбай улының билим алған Қутлымурат инақ медресесине шөлкемлестирилген саяхат профессор-оқытыўшылар ҳәм студентлерде айрықша тәсир қалдырды.

Саяхат жуўмағында профессор-оқытыўшылар ҳәм студентлер руўхый турмысымызда үлкен әҳмийетке ийе болған уллы инсан – Султан Ўайс бабаның қойымшылығын да зыяратлады.


Ислам МАТЕКОВ,

Магистратура бөлими 2-курс магистранты.
Вернуться назад