DataLife Engine > Publitsistika > КӘСИБИҢ – ӨМИРЛИК АРҚАЎЫҢ…

КӘСИБИҢ – ӨМИРЛИК АРҚАЎЫҢ…


11-07-2017, 21:24. Разместил: zlixa Дүньяда кәсиптиң түри көп. Оларды салыстырып қарасаң биринен екиншиси қызығырақ, биринен бири қыйынырақ, биринен екиншиси жақсырақтай түйиле береди. Бирақ, өмирде мине усы кәсиплер арасынан өзиң ушын арналған кәсипти таңлай алмасаң, көп дәккиге ушыраўың турған гәп. Гәпти узақтан алыўымның себеби, турмыста, жәмийетте кәсиби бойынша алжас сақпақларға түсип жүргенлер аз емес, ашынарлысы олардың бул соқпақларының гузарларға уласыўы гуман...
Қарақалпақ мәмлекетлик университетиниң журналистика кафедрасы Өзбекистандағы журналист қәнигелерди таярлайтуғын үш оқыў дәргайының бири есапланады. Бул оқыў дәргайы 30 жылдан асламырақ ўақыттан берли ғалаба хабар қураллары тараўына қәнигелер таярлайды. Ҳәр жылы журналистика қәнигелигин 20-25 студент питкерип шығып, өндириске жол алады. Бүгинги Қарақалпақ журналистикасында хызмет етип атырған қәнигелердиң дерлик көпшилиги Қарақалпақ мәмлекетлик университетин питкерген жаслар десек асыра айтқан болмаймыз. Қуўанышлы ҳәм мақтанышлы тәрепи, олардың арасында журналистикада өзиниң ылайықлы орнын таўып, белгили журналистлер қатарынан орын алғанлары баршылық. Журналистлик кәсибине ықлас қойып, оның ҳадал нанын жеп, елдиң ғамын, халықтың тәшўишин, заманның гәрдишин, дәўирдиң жылнамасын жазыўға үлесин қосып атырғанларды устазлары ҳәмийше мақтаныш етеди.
Бирақ, өмир бир текли, ал, жоллар болса бир тегис емес. Сонлықтан да, айрым ўақытлары төрт жыл даўамында өзин усы кәсиптиң пидайысы етип көрсетип, қатар мақалалары жәрияланып, диплом жумысын айрықша баҳаға қорғаған студентти журналистика тараўынан таба алмай, қыйналамыз. Ал, гейде төрт жыл даўамында ишиндегисин ҳеш кимге билдирмей жүрип, питкергеннен кейин «жарық етип» шығатуғын студентлерде болады. Дурыс «бес бармақ тең емес», бир топардағы студентлер арасынан алғыры да – ериншеги де, билимлиси де – бийпәрўасы да, талантлысы да – уқыпсызы да - шығыўы мүмкин. Бирақ, ҳәмме гәп дөретиўшилик уқыпты тәрбиялаўға байланыслы.
Журналистика математикаға усап анықлықты, юридикаға усап заңлылықты жақтыратуғын тараў. Сонлықтан да, бул кәсипти таңлаў ушын жети өлшеўдиң өзи жеткиликсиз, керек болса сегиз ямаса оннан да көбирек өлшеў артықшалық етпейди. Ал, қәтеге жол қойыўың болса, бириншиден өзиңди алжастырады, екиншиден сен усы тараўға керекли болған қайсыдур қәнигениң орнын бәнтлеўиң мүмкин. Демек, бир ғана қәтелик жәмийетке еки ямаса оннан да көбирек зыян жеткизеди. Бирақ, буның алдын алыў мүмкин, буған көп нәрсе керек емес, ал тек ғана анық мақсет, дурыс бағдар, дөретиўишилик қәбийлет болса, соның өзи жеткиликли.
Мине, ҳәзир жоқары оқыў орынларына ҳүжжет тапсырыў мапазы. Журналистикаға болса, ҳақыйқый усы қәсипке қызығатуғын, дөретиўшилик қәбилети бар (тек қосық ямаса гүрриң жазатуғынлар нәзерде тутылмайды), усы тараўға шын ықлас қойған талабанларды биз күтип қаламыз. Баслысы кәсип таңлаўда алжаспаған мақул. Себеби, кәсибиң – бир өмирлик арқаўың болатуғынлығын умытпаған мақул.

Злиха Оразымбетова – ҚМУ журналистика кафедрасының баслығы, филология илимлериниң кандидаты.
Вернуться назад