DataLife Engine > Publitsistika > Студент пенен студент сәўбети

Студент пенен студент сәўбети


8-11-2018, 09:06. Разместил: zlixa «Студентлик – алтын дәўир» деген даналық гәп бар. Мине, буның мәнисин ҳәр бир студент болған инсан жақсы аңлайды. Бүгинги күни студентлик дәўирин басынан кеширип атырған теңлеси Светлана Жәмменова менен журналистика қәнигелигиниң 4-курс студенти Э.Мунназарова сәўбетлести.
- Жоқары оқыў орнына кириў үлкен бахыт, жаңа басланған оқыў жылы ҳәм университет орталығынан алған тәсирлериңиз?
- Дурыс, жоқары оқыў орнына әсиресе, Қарақалпақтың ең абырайлы билим орны болған Бердақ атындағы Қарақалпақ мәмлекетлик университетине оқыўға кириў бул тәкирарланбас бахыт. Жаңа мәкан, жаңа атмосфера, жаңа оқыў жылы менде айрықша тәсирлер қалдырды. Бул жерде, әсиресе, мени мәргиядай өзине тартқан нәрсе ең дәслепки күннен баслап устазларымыздың биз студентлерге тәлим менен тәрбияны теңдей инәм етиўи айрықша болды. Себеби, ҳәр қандай инсанның ең дәслеп қаншама тәрбиялы, әдеп икрамлы болыўы үлкен әҳмийетке ийе деп ойлайман. Және де мени умытылмас тәсирлерге бөлеген бул бизиң устазларымыздың, әсиресе, топар басшымыз Джавот Қурбанбаев, Шарапат Қәлимбетов, Жеткер Сейтжанов, Ҳамза Нурыллаевлардың маған аталарша ғамхорлығы, қоллап қуўатлаўшы ақыл-нәсиятлары өз алдына қуўанышлы жағдай болды.
- Социаллық қоллап-қуўатлаў бағдарында университет тәрепинен жаратылған мүмкиншиликлер ҳаққында пикирлериңиз?
- Университетимизде барлық жаслар ушын, сол қатарлы социаллық қорғаўға мүтәж болған студентлерге билим алыўы ушын шараятлар жаратылған. Бул жерде бизлер ушын жатақхана ҳәм ол жерде жасаў ушын барлық шәраятлар бар.
- Билимниң инсан өмиринде тутқан орны хаққында не айта аласыз?
- Ата-бабаларымыздан қалған мына нақыл барқулла мениң есимде турады: «Бесиктен қәбирге шекем билим, өнер изле». Бул дегени биз қайсы жаста, қандай орталықта яки қандай жасаўымызға қарамай, илимге, билим алыўға, өнер үйрениўге меҳир-мухаббат ҳәм қуштарлық бизди ҳеш қашан тәрк етпеўи керек. Биз усындай заманда, мәканда жасар екенбиз баслы ўазыйпамыз берилген шексиз имканияттан өнимли пайдаланып туўылған ата-журт, Ана ўатанымызға пидәйи хызмет ететуғын жетик, билимли қәниге болып жетисиў.
- Тил үйрениўге болған қызығыўшылығыңыз ҳәм умтылысларыңыз ҳақкында айтып берсеңиз?
- Жазыўшы Вольтер былай деген екен: «Көп тилди билиў – бир қулпқа түсетуғын бир неше гилтке ийе болыў дегени». Басқа тиллерди үйрениўге, басқа халықлардың турмыс-тәризи, тарийхы, үрп-әдет дәстүрлерине қызығыўшылық менде балалығымнан бар еди. Балалықтағы пәк арзыў-нийетлер мени усы билим дәргәйина алып келди. Тийкарынан атап өтиўим тийис тәрепи мениң мақсетлеримниң бири өзимиздиң миллий әдебиятымыз, қунлы дөретпелерин шет тиллери арқалы басқа еллерге, халықларға кеңнен таралыўына өз үлесимди қосыўдан ибарат.
-Заманласларыңызға тилеклериңиз!
-Елимиз тыныш, ўатанымыз абадан, кеўил дүньямыз руўхый бай болсын. Илимге, блимге сүйиспеншилик сизди ҳешқашан тәрк етпесин. Ана диярымызды гүллеп-раўажландырыў жолындағы пидәкерлик бәршемизге яр болсын.

Вернуться назад